套戲都算好睇, 起碼唔悶, 廿三年前喎, 唔覺悶, 唔覺老土, 入到戲好難得架喇! 而我仲要覺得幾好睇Tim!

故事簡單D講即係講初戀, 17歲既女主角沖野瞳 (原田知世)因為影相認識42歲既尾川(林隆三), 唔可以話係一見鍾情, 但係總知最後就係鍾意左啦, 食過兩次飯之後突然有一日係沖野瞳過左世既母親舊相簿見到尾川, 先知原來佢地廿年前係戀人, 但係因為尾川要去美國而分手.

沖野瞳因為父親因為公幹而忘記母親忌日, 再加上準備再婚, 而決定繼續忙母當年既一段情…

劇情就算過左咁多年都一D都唔老土, 而且好多地方都好合情合理, 好似沖野瞳因為想尾川知原來佢就係舊情人個女, 而愉愉地放左廿年前既一張相入尾川既公事包, 我個時就已經係到諗:如果俾我? 睇怕要一年半載先會見到. 果然, 最後係沖野瞳忍唔住打電話俾尾川提佢, 佢先知有張咁既相係公事包 (果然全世界既男人都係唔「汁」野架下)!

睇完之後上wikipedia睇原田知世, 原以為佢80年代之後就無乜點拍戲, 原來唔係喎, 而且唔止有, 仲要係差唔多年年都有! 我諗香港8/90年代之後都真係少日本戲上, 唔知買唔買到呢? 有機會去HMV睇下先…

最近角川先驅映晝館返出好多套8, 90年代既既日本電影, 我買左呢套同埋「超能校園美少女」, 睇完Tralier仲想去買埋「探偵物語」因為呢套係咁多套唯一一套我係見過但係未睇過既…. 買o黎睇下先!

Links:
原田知世

買既原因係我記得好似睇Blog既時候有人講過好好睇, 又好似電影節想睇但係無睇, 最後原來兩款都唔係, 只係記錯….>.<

放低左幾個星期, 今日見得得閒閒, 就煲左既喇.

成套戲我只係認得柴崎幸, 其他個D好似認得, 可能係其他戲見過, 但係又up唔出係邊度見過...

基本上係好睇既, 唔係太商業但係又唔會悶, 主角鬼塜(阿部貞夫)最出, 做到「去吧！稻中乒團」個仲誇張感覺, 反面柴崎幸就麻麻地, 最後舞技個造型反而唔夠駒子(小出早織)咁入型入格. 入面D笑位都唔少, 但係就唔係好引到我笑....

反而有一度比較深刻既係主角鬼塜為左要同棒球手內藤貴一郎鬥, 由即食面小職員走左去打棒球(又俾佢做到喎), 點知做到既時候內藤又走左去拍戲, 佢又跟...佢一路跟, 內藤就一路係咁轉, 由拍戲到拳擊到賣拉麵到選市長, 一路跟, 但係又一咁周圍同人講自己唔係同內藤鬥.... 好似我都有過呢仲感覺...係同邊個呢.......?

延伸閱讀:
- 舞妓哈哈哈官方部落格
- 舞妓哈哈哈：純愛狂想 080120

* * * * *
覺唔覺有D明星, 你硬係唔記得幾時開始紅, 明明係第一,二次見, 但係又好熟面口唔知係邊度見過, 我估都係市場策略啦…柴崎幸就係其中一個喇.

我對佢有比較深刻既印像係舊年電影節睇既怪俠多羅羅, 柴崎幸係戲入面做得好好, 起碼我會因為咁想睇返漫畫(雖然仲未), 而都因為咁而家見到柴崎幸會記得佢做過多羅羅但係就點諗都諗唔起原來佢之前都有做過「在世界中心呼喚愛」同「 大逃殺」丫 (唔係睇番Wiki真係唔知…..)

延伸閱讀:
- 忽然爛尾的多羅羅
* * * * *

係屋企附近發現左間漫畫舖, 入面有晒(我估)手塚治虫既書…原來有好多都無睇過, 有D想買晒佢, 但係又唔知放係邊…都係等有地方既時候先啦….