上星期同朋友開左支94年o既La Reserve du General Margaux, 可能係因為佢係副牌酒, 所以價錢都可以接受. 反而想講o既係開酒個個真係幾正, 起碼佢知道呢支酒要抖氣, 抖完之後倒入隻杯俾我試之前, 佢仲會左右係咁大力搖隻杯等d酒同空氣混和得好一d先俾我飲… 原本我好少試酒 (主要係唔想交戲), 最多聞下無變壞就會叫到俾其他人飲, 但係今次佢咁認真, 我當堂肅然起敬, 暗自決定今次一定要交足戲俾佢..
我攞起杯酒, 望一望, 搖一搖, 聞一聞…第一個感覺覺得香但係好似仲有少少澀, 再試下飲, 第一下証明真係仲有d澀, 似乎仲要放耐少少. 我再繼續飲, 香味同澀味一齊流入喉嚨, 我不其然望一望遠少少o既地方, 深呼吸, 心入面真心咁同我自己講: 「都係…可樂…好飲d」….放低杯再示意無問題….交戲完畢, 10分!
但係放耐左之後支酒變得好飲好多, 苦澀味無晒, 我同我自己講下次飲一定會用decanter, 一定!
可惜o既地方係飲得兩三個鐘, d苦澀又出番晒o黎, 呢次係我第二/三次有咁o既感覺 (我又係飲得慢左d o既), 可能下次都係要飲快d / 叫多d人飲先得….
其本上都係一支好飲o既酒, 有機會會想飲多次…..
後記:
寫呢篇Blog o既時候仲係公司, 20:09一路聽住Michael Bublé 一路寫, 感覺良好!
