Andrew November 25th, 2007
琴日去舊公司HR攞Cheque，個銀碼比想像中少，有少少失落, 但係唔緊要啦, 佢又真係無計錯, 係大家approch唔同啫. 我攞住張Cheque行過地產鋪o既時候見到呢個廣告…
咁大個仔我都係第一次見到有樣2億o既野擺係街度賣咋! 即係…大家知唔知到底2億有幾多呢? 嗱, 香港人均收入大約係16K一個月, 我當平均每個人都係由20歲開始做, 做到70歲退休啦, 即係一生人大約係有50年時間係有收入o既! 即係話香港人平均一世人都係賺得o個16K*12*50 = 九百六十萬, 一千萬都唔到.
如果你有2億, 搵一個唔係太差o既基金經理睇住, 平均一年要賺到比通脹多5%o既利潤真係唔難, 講真仲有d保守添, 而2億o既5%就係一千萬喇!
即係話你乜野都唔駛做就可以每年賺到人地做一世都賺唔到o既錢, 當然, 你仲可以每年請一個人幫你打一世工添!
咁就係2億喇.
有d想打俾呢個Maggie Wang問下佢(同佢公司啦)o既commission有無5%咁多呢?
後記:
奇喇, 人地話養一個小朋友要駛四百萬, 但係一生人都係賺o個一千個唔夠, 點養呀? 仲有仲有, 養我又係要四百萬, 咁~~係唔係即係未出o黎做野已經駛左四成喇? 點還呀? 唔好喇, 不如今晚坐夜船走佬喇…
Andrew November 22nd, 2007
對住公司個mouse話要將寫physics.com.hk常規化，唔經唔覺都已經有兩個星期．其間睇左幾本書，寫左呢個Blog，買左部新電話，係勞工處出左我人生第一個Post請人，轉左工，連我呀媽都買左部新電話．physics.com.hk我都重係掂都無掂過，連「求求其其加個youtube就當係一篇個d」都無！
同朋友係Internet講開Entanglement，Entanglement係一個好有趣ｏ既物理現象要講就要講埋Quantum同Dimension．仲可以涉及光速, 宇宙起源, WMAP…仲可以解答少少阿Simon兄年幾之前係physics.com.hk問ｏ既問題．．．似乎係一個唔錯ｏ既題目，(可以好)有趣，而且有排寫．．．(其實年幾以前都寫左少少，而家仲係個Draft度．．．）
我肯定如果我係大科學家／小說家，呢個一定係一套驚天動地作品，諗下，我上次認真寫已經係年幾之前喇．．．
問題家下我寫Blog啫．．．有無咁難落筆呀．．大作家~~！
延伸閱讀：
將寫BLOG常規化
Entanglement @ wikipeida
WMAP
Andrew November 22nd, 2007
我係一間房入面，換緊杉，唔係，我估係著緊杉至真因為我著著下發覺條褲係出面，好自然就出去攞啦發覺出面有人，有ｄ唔好意思，拿拿琳攞左條褲返入房繼續.
返入房著好先發現間房有人，佢．．．坐係張枱前面等緊Interview….=.=”
之後我發左好大脾氣：「點解佢可以就咁坐係度架，咁佢未睇晒?」，「點解我可以唔知架／佢可以唔講我知架」，「點解要安排佢係我間房度等架」等等．．．
我出廳搵人質問，我問，有人答，我地一路Argue，一路走，上左架巴士／火車．．．似火車多ｄ，唔記得有乜野人，但係肯定起馬有陳冠希.
最後發覺．．死火．．．ｏ黎見工個位仲房係度等．．
後記：
我肯定係因為呢排見緊幾個人，而且當中我要佢等我回覆，但係我遲遲都未回．
陳冠希可能因為農夫，亦有可能係東Touch封面．
其他果ｄ真係R晒頭.
Andrew November 17th, 2007
一直都好想買隻錶, 但係簡o黎簡去都簡唔中一隻o岩心水o既…
Choice Phobia Disorder
今日係雜誌見到一個DIESEL錶o既廣告, 完全唔係我想要o既款, 我見到呢個廣告o既時候就一直係度諗… 佢好似..掉轉左隻錶帶喎…, 定係隻錶會叻到detect到邊面係下面, 繼而會自己掉返轉呢…唔會掛, 咁o既function有乜用呀…我估都係個攝影師賴有型, 掉轉左都唔知多喇…
睇下睇下又幾好睇喎, 不如買囉….唔知幾錢呢?
Andrew November 15th, 2007
講你都唔信, 我搵到小學本記念冊喎!
我仲記得第一個幫我寫記念冊係一個姓陳o既女仔, 我叫得佢第一個寫, 我緊係鍾意佢啦. 但係你知啦, 小學係一個人言可畏o既地方, 俾大家見到陳小姐寫頭一版我…我…點解釋呢?仲有仲有, 如果隔離位個麻甩仔寫係陳小姐個版o既前/後咁點算呢?陳小姐同麻甩仔點能夠咁親密o既呢…. 12歲o既我係度諗….
好彩, 我天生出o黎就係解決埋呢d無聊o既野, 我用左一個方法, 跟.學.號.! 當年佢係3號, 我係4號, 而2號又係一個無乜殺傷力o既女仔, o岩晒!
我同陳小姐講「寫呢版丫, 係…係.. 我諗住跟學號..無錯..都唔係好麻煩啫.. 係..係…」佢一寫完我跟手即刻係後面自己寫記念冊俾自己… 再叫2號o個位范小姐係陳小姐前面寫: 「係…係.. 我諗住跟學號…無錯係呢度喇, 唔該!」
無聊? 點會呀, 一間俾隔離位個條麻甩仔…咁點得架…我同你講, 咁多年以o黎我無後悔過!!
我發現我o既第一句同陳小姐o既唯一一句分別只係多左一個字, 之後仲要寫一大堆野掩飾… 我估…我係有諗過度過先會咁做… 正一麻甩仔!
Andrew November 14th, 2007
11月11號, 星期日, 天晴: 今日發姣係中環三聯斥資175個大洋買左本筆記簿, 但係買左之後又諗唔到點用先好….
我係o個種唔寫低就諗唔到野o既人, 有無睇過《太陽照常升起》? 係戲入面當姜文知道佢老婆(孔維)同房祖名有染, 返去城市搵朋友傾訴, 佢朋友就一路同姜文分析一路係張紙度亂咁晝, 我就係呢種人喇:基本上講完之後張紙無人會睇得明, 但係唔晝咩, 又唔知點講喎…
但係如果你叫我係呢本「咁名貴」o既筆記簿度亂咁晝又好似唔係幾好咁…
望住本筆記簿忽發奇想, 不如要o黎做記念冊啦, 更係唔係叫人係上面寫埋d咩「萬里長城長又長, 你我友誼比它長」又或者咩「One Two Three, Three Two One, 祝你年年Number One!」啦 (當然如果你要我都無計…), 而係去買支簽名筆係咁叫朋友簽名…. 唔…可以諗下, 可以諗下….
話時又話我小學本記念冊去左邊呢, 前幾年好似見過一次….
Andrew November 13th, 2007
「今日, 我對住呢隻Mouse講, 我要將寫physics.com.hk呢件事常規化!仲要唔計求求其其加個youtube就當係一篇個d!」眼入面好明顯有團火o既我, 揸住公司隻Mouse好有氣勢咁講!
呢段野係我上星期五係gtalk個message自己同自己講, 今日係星期二, 都係一篇野都無寫過, 反而起多一個Blog, 搞乜鬼!?
